Michelle និង Jean ទៅនេប៉ាល់ ដើម្បីចូលរួមកម្មវិធី “សភារថយន្តអន្តរជាតិ” ដែលមានលោក Jean ជាប្រធាន។ ពេលកើតមានគ្រោះរញ្ជួយដី អ្នកទាំងពីរនិងភ្ញៀវដទៃទៀត កំពុងតែស្ថិតក្នុងកម្មវិធី នៅសណ្ឋាគារមួយនៅឡើយ ហើយភ្លាមៗនោះ ពួកគេបាននាំគ្នារត់គេចចេញ។
ប្រភពបានឱ្យដឹងថា នៅតាមដងផ្លូវ មានភាពចលាចលយ៉ាងខ្លាំង ពេលមនុស្សជាច្រើនជែងគ្នា រត់រកកន្លែងសុវត្ថិភាព។ បើទោះបីជាមានសភាពគួរឱ្យខ្លាច និងរញ្ជួយដីកក្រើកយ៉ាងណា តារាសម្ដែងវ័យ៥២ឆ្នាំ រួមទាំងគូដណ្ដឹងមិនមានគ្រោះថ្នាក់អ្វីទេ។
ក្រោយមកគូស្នេហ៍ខាងលើ បានរូតរះមកប្រលានយន្តហោះ Kathmandu តែជើងហោះហើរ ត្រូវបានគេលុបចោល ដោយសារប្រព័ន្ធទំនាក់ទំនង មិនដំណើរការ។ មិនអាចទាក់ទងទៅខាងក្រៅបាន ពួកគេមិនអាចទៅណាបាន ក្រៅពីប្រទេសនេប៉ាល់ទេ។ នេះបើតាមការឱ្យដឹង ពីគេហទំព័រ Jaynestars។
យ៉ាងណាមិញ ប្រធានសមាគមរថយន្តហុងកុង បាននិយាយថា “ឥលូវពួកគេកំពុងស្នាក់នៅក្នុងសណ្ឋាគារមួយ។ សំណាងល្អពួកគេ អាចគេចផុតពីគ្រោះថ្នាក់នៅខាងក្រៅ។ Michelle និងគូដណ្ដឹង មានសុវត្ថិភាពទេនៅពេលនេះ”។
អំឡុងពេលកើតគ្រោះរញ្ជួយដី មានទេសចរប្រមាណ ៣០០ ០០០នាក់នៅនេប៉ាល់ ហើយបច្ចុប្បន្នតំបន់ភាគច្រើន ក្នុងប្រទេសមួយនេះ គឺគ្មានអគ្គិសនីប្រើប្រាស់ទេ។ បើយោងតាមការឱ្យដឹង របស់បណ្ដាគេហទំព័របរទេស ក្នុងពេលថ្មីៗនេះ ចំនួនអ្នកស្លាប់ដោយគ្រោះរញ្ជួយដីនៅនេប៉ាល់ បានកើនឡើងជាង៤០០០នាក់ហើយ៕
ប្រែសម្រួល៖ អ៊ុំ សុភក្តិ
ប្រភព៖ Jaynestars
No comments:
Post a Comment